Ev heyvanları uşaqların inkişafına necə təsir göstərir

Balaca uşaqlar ilə ev heyvanlarının video və ya şəkilləri hamımızı heyran edir. Ancaq çox az insan heyvanın uşağın inkişafına göstərdiyi təsir haqqında düşünüb; elmi sahədə isə bu mövzuya aid bir çox tədqiqatlar aparılıb. Psixoloqlar razılaşır ki, ev heyvanı ilə oynayaraq uşaq nəinki fiziki, hətta emosional və sosial cəhətdən inkişaf edir.

Mütaliə

İndiana Universitetinin doktoru Geyl F. Melsonun “Heyvanlar uşağın həyatında” kitabına əsasən, ev heyvanları ilə böyüyən uşaqlar sərbəst mütaliəyə daha tez keçirlər. İt, pişik və ya tutuquşuna  kitab oxuyaraq, uşaq heyvana suallar verir və ya hekayənin gərgin anlarında onu sığallayır. Bu uşağı emosional olaraq kontekstə cəlb edir.

Qayğı

Doktor Melson həmçinin qeyd edir ki, heyvanlar uşaqları qayğı göstərməyə öyrədir. Onun fikirincə, qayğı göstərmə istəyi uşağa genetik olaraq keçmir və uşaq bunu valideyinlərinin nümunəsində öyrənmir. Qayğı göstərə bilmək gündəlik təcrübə tələb edən bir bacarıqdır və burada buna ev heyvanları yardımçı olur. Üç yaş və yuxarı uşaqlı ailələrdə aparılan müşahidələrin nəticələri göstərib ki, uşaqlar öz bacı və qardaşlarına yox daha çox ev heyvanlarına qayğı göstərirlər. Doktor ev heyvanları ilə ünsiyyət qurmağı oğlan uşaqları üçün daha vacib olduğunu vurğulayır, çünki qızlarda mərhəmət və mehribanlıq təbii olaraq ana instinkti üzrə qoyulub.

Valideynlərlə bağlılıq

Digər üstünlük olaraq Melson ev heyvanlarının ailə daxili münasibətlərin möhkəmləndirilməsinə olan təsirini göstərir. Heyvan ilə birgə oynamaq və gündəlik qayğı uşaqlar və valideynlər arasında mehribançılıq yaradır, onların emosional vəziyyətinə müsbət təsir göstərir, stres və ya təlaşdan yayınmağa kömək edir. Bundan əlavə, ev heyvanına qulluq üçün məsuliyyəti bölüşdürmək uşaqlarda məsuliyyət hissini inkişaf etdirir.

Mənimsəmə və ünsiyyət

Ev heyvanları habelə uşaqların psixiki inkişafına müsbət təsir göstərirlər. “Uşaqlar və onların ev heyvanları aləmi” kitabında doktor M.R. Calonqo yazır ki, psixi problemli uşaqlar oxuyan sinifə itlərin gətirilməsi şagirdlərin təhsilinə müsbət təsir göstərmişdir. Bundan əlavə, ev heyvanı uşağın öz emosiyalarını ifadə etməsinə səbəb olur. Müəyyən olunub ki, ev heyvanları ilə yaxın ünsiyyətdə olan uşaqlar ümumiyyətlə daha az həyəcanlı və daha az özünə qapalı olurlar.

İmmunitet

Corciya Universitetinin immunologiya kafedrasının müdiri, doktor Denis Ounbinin tədqiqatı göstərib ki, iki-üç it və ya pişikli ailədə anadan olan uşaqlar heç bir ev heyvanı olmayan uşaqlardan fərqli olaraq iki dəfə daha az allergiyadan əziyyət çəkirlər. Bunun daha bir təsdiqini İsveç alimləri tapıblar. Onların tədqiqatına əsasən ev heyvanları olmayan ailələrdə uşaqlarda allergiya 49% hallarda baş verib, beş və daha çox ev heyvanları olan ailələrdə isə bu göstərici 0% -dək düşə bilib.

Bundan əlavə ev heyvanları ilə yaşayan uşaqların yoluxucu xəstəliklər və soyuqdəyməyə daha az həssas olduqları aşkar olunub. Bunu, Vorvik Universitetinin doktoru Cun Maknikolasın apardığı araşdırmalar təsdiqləyib.

Alimlər dəqiq səbəb demirlər, lakin təxmin edirlər ki, heyvan ilə təmasda olduğu an uşağın immun sistemi yad bakteriya və allergenlərə öyrəşməyə başlayır.

Ev heyvanlarının uşaqların inkişafına dair üstünlükləri burada bitmir. Hazırda elmi cəhətdən təsdiq olunub ki, ev heyvanları ətrafında böyüyən uşaqlar ev heyvanı olmayan yaşıdlarından intellektual və emosional olaraq daha inkişaf etmiş olurlar.