Tez və asan qeydiyyat!
Evə
bala it gətirdikdə onunla insan içinə çıxmağa səbirsizlənirik. Heyvanın küçəyə
çıxması, oynaması və təmiz havada gəzməsi onun sağlam böyüməsi və inkişafı üçün
ilkin şərtdir. Şübhəsiz ki, indi çoxları düşünəcək: iti gəzdirməkdə nə çətin
bir şey var, xaltanı taxırsan və çıxırsan çölə. Lakin onlar bunun da öz
qaydaları olduğunu düşünmürlər və buna məhəl qoymamaq sevimli dostumuzun həyatını
riskə atır.
Bala iti nə vaxt çölə çıxarmaq olar
Ev
heyvanınızın parvovirus kimi dəhşətli bir xəstəliyə tutulmasını istəmirsinizsə,
onu gəzintiyə aparmağa başlamazdan əvvəl peyvənd olunmasını təşkil etməlisiniz.
Son peyvənddən yalnız 2 həftə sonra bala iti gəzməyə çıxarmaq olar. Bu, adətən
itin 16-18 həftəlik yaşında baş verir. Lakin bala itin cinsinə və sağlamlığına
görə bu rəqəm dəyişə bilər. Bundan əlavə, çölə çıxmağa üç gün qalmış iti birə və
gənəyə qarşı dərmanlamaq lazımdır.
Bala iti nə vaxt bəsləməli: gəzintidən
əvvəl və ya sonra
Səhər
gəzintisi onun üçün nəzərdə tutulub ki, bala it bağırsağına gecə ərzində yığılmış
hər şeydən azad olsun və artıq yüngül şəkildə aktiv gəzə bilsin. Belə gəzintidən
sonra it adətən iştahla yeməyə başlayır. Ancaq iti gəzintidən əvvəl bəsləsəniz,
mədəsinin dolu olması səbəbindən onun aktivliyi azalacaq.
Bala it ilə nə qədər tez-tez gəzməli
Yadda
saxlamaq lazımdır ki, ev heyvanının ilk növbədə təbii ehtiyaclarının öhdəsindən
gəlməsi üçün gəzintilərə ehtiyacı var. Fizioloji səbəblərə görə, ilk bir neçə
ayda, bala it tualetə daha tez-tez istəyir. Adətən gəzintilər arasında 2-3 saat
keçir. Tədricən, bir neçə ay ərzində körpə rejimə alışır və gəzintilər arası
vaxt altı və daha çox saat uzana bilər.
Bala it neçə müddət gəzməli
İt
ilə gəzintilərin müddətini müəyyən etmək üçün çox sadə bir hesablama mövcuddur:
bala itin yaşı (aylarda) beşə vurulur. Nəticədə alınan rəqəm, itin orta hesabla
gündə iki dəfə gəzdirilməsinin lazım olduğunu nəzərə alaraq, ev heyvanı ilə bir
gəzintiyə sərf etməli olduğunuz dəqiqələrin sayıdır. Məsələn, dörd aylıq it ilə
bir gəzintiyə 20 dəqiqə vaxt sərf edilməlidir. Əlbəttə ki, bunlar yalnız təxmini
rəqəmlərdir, çünki çox şey itin yaşından, cinsindən və təbiətindən asılıdır.
Çixuaxua
və ya pomeraniya şpitsi kimi kiçik cins itlər qısa ayaqları səbəbindən çox
yeriyə bilmirlər. Lakin, onlar tez böyüyürlər, buna görə də erkən yaşdan
tullanmağı və müxtəlif məşqləri etməyi bacarırlar. Böyük cinslərdə bu belə
deyil. Ölçülərinə görə uzun məsafələri qət edə bilirlər, lakin onlarda böyümə
prosesi daha yavaş olduğu üçün erkən yaşda fiziki fəaliyyət onların əzələ-hərəkət
sistemində problemlərə səbəb ola bilər.
Bala
itin yorulduğunu anlamaq üçün ona diqqət yetirin. İt tez-tez oturmaq istəyirsə
və daha az hərəkət edirsə, deməli o yorğundur və evə dönməyə hazırdır.
Bala itin xaltaya və xalta qayışına
alışması
Bala
itin dərhal xalta qayışı ilə yeriməyi öyrənəcəyini düşünmək əslində səhvdir.
Xalta qayışı ilə gəzmək çox kiçik yaşlardan öyrədilməli olan bir bacarıqdır.
Bala iti, hələ çölə çıxa bilmədiyi müddətdə, ev şəraitində təlim etmək
yaxşıdır.
Əvvəlcə
ev heyvanınızı xalta qayışı və xalta ilə tanış edin. Ən yaxşısı, aksesuarları
onun yanına qoyun ki, bala onları iyləyə bilsin, sonra onun marağını dadlı çərəzlərlə
mükafatlandırın. Növbəti addım xaltanın itin əyninə ölçülməsidir. Xaltanı itin
boynuna taxmağa çalışın və sözünüzə baxdıqda onu dadlı çərəzlə mükafatlandırın.
Xalta ilk dəfə tez çıxarılmalıdır. Aksesuarların geyinmə müddəti, ev heyvanı
onlarda mümkün qədər rahat olana qədər, tədricən artırılmalıdır.
Hələ
böyüyən bir bədənin anatomik xüsusiyyətlərinə görə bala it üçün ən uyğunu sinə
qayışıdır. Hollandiya brendi Beeztees-in bala itlər üçün sinə qayışı digərlərinə
bənzəmir. Yumşaq material körpənin dərisini zədələmir, rahat bağlayıcılar isə
geyinmə prosesini xeyli asanlaşdırır.
Bala itə düzgün gəzməyi öyrədin
Ev
heyvanınız xaltaya öyrəşdikdən sonra ona özünüzlə gəzməyi öyrədin. Bu,
göründüyü qədər çətin deyil. İtin sizdən başqa istiqamətə uzaqlaşdığını və ya
irəli qaçdığını görən kimi yerinizdə dayanın.
Belə
edərək siz ona bildirirsiniz ki, o sizin yanınızda düzgün yer tutmayana kimi gəzintiyə
davam etməyəcəksiniz. Əgər it tez-tez yoldan keçən avtomobillərə yayınırsa, digər
itlərə hürürsə, xalta qayışını dartırsa, onda bu üsul sizin işinizə yarayacaq.
Bu texnika bir az vaxt apara bilər və hətta ev heyvanı tərəfindən narazılıqla
qarşılana bilər. Ancaq tez bir zamanda nəticə özünü göstərəcək. Sözünüzə
baxdıqda balanı mükafatlandırmağı unutmayın.
İt həddindən artıq hürür
Bu,
çox vaxt ev heyvanının gün ərzində fiziki və zehni gərginlikdən məhrum olduğunu
ifadə edə bilər. Bala itiniz ilə daha tez-tez gəzməyə çalışın. Əgər siz daim məşğulsunuzsa,
o zaman yaxınlarınız sizin köməyinizə çata bilər, yaxud şəhərinizdə olan xüsusi
it gəzdirmə xidmətlərindən istifadə edin.
Gəzintidən sonra
Gəzintidən
sonra itin pəncələrini nəm salfetlər ilə silin. Çöl yağışlı və çirkli olarsa,
iti çimdirmək lazım gələ bilər.
Bala
iti gəzdirmək təkcə əyləncə və oyun üçün deyil, həm də sağlamlığı və inkişafı
üçün vacibdir. Ona görə də düzgün vərdişlər ilk andan formalaşdırlılmalıdır.